رفح اور خان یونس پر فضائی حملے، 30 فلسطینی شہید، متعدد زخمی

غزہ : صیہونی فوج کے رفح اور خان یونس پر حملوں میں مزید تیس فلسطینی شہید اور کئی زخمی ہوگئے۔ اسرائیلی فضائیہ نے رفح میں بے گھر افراد کی رہائش گاہ کو نشانہ بنایا جس کے نتیجے میں سات شہید ہوئے۔ جنگی طیاروں نے شہر کے وسط میں واقع علاقوں پر بھی حملے کیے۔ طیاروں نے المغازی پناہ گزین کیمپ میں ایک اسکول کو بھی نشانہ بنایا۔ خان یونس میں بھی رہائشی عمارت پر حملہ کیا گیا۔الزوائدہ قصبے اور النصیرات کے مضافات میں مزاحمت کاروں اور قابض فوج کے درمیان شدید جھڑپیں ہوئی ہیں۔
مزاحمت کاروں نے وسطی اور شمالی غزہ کو اسرائیلی فوج کا قبرستان بنادیا۔ دو دن کے حملوں میں اسرائیلی فوج کو بھاری نقصان پہنچا۔ ستر سے زائد فوجی گاڑیاں تباہ کردیں۔ اسرائیلی فوج کےترجمان ڈینیئل ہگاری نےدعویٰ کیا ہے کہ شمالی غزہ میں حماس کے فوجی ڈھانچے کو ختم کرنے کا کام مکمل کرلیا ہے۔ اب وسطی اور جنوبی علاقوں میں حماس کو ختم کرنے پر توجہ مرکوز ہے۔ وسطی حصے میں پناہ گزین کیمپ دہشت گردوں سے بھرے ہوئے ہیں۔