آبنائے ہرمز میں جہازوں کی آمدورفت کے نقشوں پر عمان سے اتفاق ہوگیا، محسن رضائی

تہران: ایرانی سپریم نیشنل سکیورٹی کونسل کے سیکریٹری محسن رضائی نے کہاہےکہ آبنائے ہرمز میں بحری جہازوں کی آمدورفت کے نقشوں پر عمان سے اتفاق ہوگیا ہے۔ محسن رضائی نے مزید بتایا کہ آئندہ چند روز میں آبنائے ہرمز میں ایک نئے کوریڈور سے متعلق مفاہمتی یادداشت پر دستخط ہوں گے، جس میں آمد و رفت مکمل طور پر ایران کے انتظام میں ہوگی۔ محسن رضائی نے کہا ہے کہ نیا محدود زون آئندہ چند روز میں نافذ کیا جائے گا۔ یہ زون امریکی بحریہ کی ناکہ بندی کی لکیر سے شروع ہو کر خلیج فارس کے ان حصوں تک پھیلے گا جو آبنائے ہرمز کے داخلی راستے اور کارگو لادنے والی بندرگاہوں کی جانب جاتے ہیں۔
انہوں نے کہا کہ تہران سے رابطہ کیے بغیر اس علاقے میں داخل ہونے والے بحری جہازوں کو ایرانی پابندیوں کی فہرست میں شامل کر دیا جائے گا۔ انہوں نے خبردار کیا کہ دونوں اطراف سے آبنائے ہرمز کی جانب آنے والے جو بحری جہاز مقررہ علاقے میں بغیر رابطے کے داخل ہوں گے، انہیں ایرانی پابندیوں کا سامنا ہوگا، جس سے انشورنس اور مستقبل میں گزرنے کے معاملات متاثر ہوسکتے ہیں۔