Raza Musani 
جدہ: خلیجی ممالک نے شام کی عرب دنیا میں واپسی اور بحران کے خاتمے کیلئے مشاورت تیز کرنے پر اتفاق کیا ہے۔ جدہ میں سعودی وزیر خارجہ شہزادہ فیصل بن فرحان کی میزبانی میں وزرائے خارجہ کا غیر رسمی مشاورتی اجلاس ہوا جس میں بحران کے خاتمے کی کوششوں میں عرب قیادت کے کردار کی اہمیت پر بھی زور دیا گیا۔ اجلاس کے بعد جاری اعلامیہ میں کہا گیا ہے کہ ایسا سیاسی حل تلاش کرنا بہت ضروری ہے جو شام کے اتحاد، سلامتی، استحکام، سرزمین اور عرب شناخت کو محفوظ رکھے۔ بیان میں کہا گیا ہے کہ اجلاس نے انسانی بحران کے حل کی اہمیت پر بھی اتفاق کیا جس میں شام کے تمام خطوں تک امداد پہنچانے کے لیے مناسب ماحول کی فراہمی، شامی پناہ گزینوں اور بے گھروں کی واپسی کے لیے ضروری حالات پیدا کرنا شامل ہے۔ ریاستی اداروں کے لیے شام کی خودمختاری کو برقرار رکھنے کے لیے وہاں مسلح ملیشیاؤں کی موجودگی کو ختم کرنے اور شام کے اندرونی معاملات میں بیرونی مداخلت کے خاتمے کی ضرورت پر زور دیا۔
