Raza Musani 
مظفر آباد: آزاد کشمیر میں اکتیس سال بعد بلدیاتی انتخابات میں پاکستان تحریک انصاف نے میدان مارلیا۔ بلدیاتی الیکشن کے پہلے مرحلے میں سخت سردی اور برفباری کے باوجود لوگوں کا جوش و خروش دیکھا گیا۔ ایک دو چھوٹے چھوٹے واقعات کے علاوہ پولنگ پرامن ماحول میں ہوئی۔ غیر سرکاری نتائج کے مطابق یونین کونسلز میں پاکستان تحریک انصاف کا پلہ بھاری رہا اور اس نے تینوں اضلاع میں مجموعی طور پر 34 نشستوں پر میدان مار لیا۔ پیپلز پارٹی آزادکشمیر 23نشستیں لے اڑی۔ ن لیگ کو صرف 8 نشستیں ملیں۔5نشستیں آزاد امیدواروں کے نام رہیں۔ مسلم کانفرنس ایک نشست حاصل کرپائی ہے۔ضلع نیلم کی 15 یونین کونسلز میں سے 7پر پی ٹی آئی کامیاب ہوئی۔ پیپلز پارٹی نے 3 ، مسلم لیگ ن نے 2 جبکہ 2 آزاد امیدوار کامیاب ہوئے۔ جہلم ویلی کی 18 میں سے 10 یونین کونسلز پی ٹی آئی کے نام رہیں۔ پیپلز پارٹی نے 3 اور مسلم لیگ ن نے 5 نشستوں پر کامیابی حاصل کی۔ ضلع مظفرآباد کی 41 یونین کونسل میں پی ٹی آئی نے 16 جیت لیں، پیپلز پارٹی نے 17 ، مسلم لیگ ن نے 2 مسلم کانفرنس 3 جبکہ آزاد امیدوار 2 نشستوں پر کامیاب ہوئے۔
