Raza Musani 
افغانستان میں سیکیورٹی اہلکاروں کی کارروائی میں داعش سے وابستہ پانچ دہشت گردوں کو ہلاک کردیا گیا۔ صوبہ بلخ کی پولیس کے ترجمان محمد آصف وزیری نے بتایا ہے کہ سیکیورٹی اہلکاروں نے مزار شریف شہر کے تین علاقوں میں واقع داعش کے ٹھکانوں پر کارروائی کی اور اس دوران پانچ داعشیوں کو ہلاک اور متعدد کو زخمی اور گرفتار کرلیا۔
صوبہ بلخ کے پولیس ترجمان محمد آصف وزیری نے بتایا کہ اس کارروائی میں ایک سیکیورٹی اہلکار زخمی ہوا اور داعشی عناصر کے ٹھکانے سے اسلحہ اور گولہ بارود برآمد ہوا۔ طالبان انتظامیہ کے ترجمان ذبیح اللہ مجاہد نے بھی اس کارروائی کی تصدیق کی ہے۔
یاد رہے کہ گذشتہ ہفتے مزارشریف میں واقع تبیان ثقافتی مرکز پر ایک خودکش حملہ کیا گیا تھا جہاں صحافیوں سے متعلق ایک پروگرام چل رہا تھا۔ داعش نے اس حملے کی ذمہ داری قبول کی تھی۔
