Raza Musani 
کابل: طالبان سربراہ ملا ہیبت اللہ آخوندزاده نے ملا محمد حسن آخوند کو سبکدوش کرکے مولوی عبدالکبیر کو نیا وزیراعظم مقرر کردیا۔ العربیہ کی رپورٹ کے مطابق ملا محمد حسن آخوند کو خرابی صحت کی وجہ سے عہدے سے ہٹایا گیا ہے۔ مولوی عبدالکبیر اس سے پہلے نائب وزیر اعظم برائے سیاسی امور کی ذمہ داریاں انجام دے رہے تھے۔ ملا ہیبت اللہ آخوندزاده نے نیشنل انفارمیشن اینڈ میڈیا سینٹر کے سربراہ انعام اللہ سمنگانی کو قندھار میں ثقافت اور اطلاعات کا سربراہ مقرر کیا ہے۔ مبصرین کا خیال ہے کہ یہ فیصلے حکومت اور میڈیا پر کنٹرول کو سخت کرنے کیلئے اٹھائے گئے ہیں۔ یہ فیصلہ ایسے وقت کیا گیا ہے جب کہ طالبان کی صف اول کی قیادت اور وزیرداخلہ سراج الدین حقانی کے درمیان اختلافات موجود ہیں۔ وزیر داخلہ سراج الدین حقانی انتظامی نوعیت کے فیصلوں اور اقدامات پر ناراضی کا اظہار کرتے رہے ہیں۔
