سوڈان میں لگی آگ سے پورا خطہ لپیٹ میں آسکتا ہے، گوتیرس

نیویارک : اقوام متحدہ کے سیکریٹری جنرل انتونیو گوتیرس نے خبردار کیا ہے کہ سوڈان تنازع سے تباہ کن آگ بھڑکنے کا خدشہ ہے جو خطے اور اس سے باہر کی دنیا بھی لپیٹ میں آجائے گی۔ انتونیو گوتیرس نے کہا سوڈان کھائی کے کنارے پہنچ چکا ہے اسے واپس لانے کے لیے اپنی طاقت کے اندر سب کچھ کرنا چاہیے۔ انہوں نے سلامتی کونسل کے 15 ارکان پر زور دیا کہ وہ 2021 کی فوجی بغاوت کے بعد سوڈان کو جمہوریت کے راستے پر واپس لانے کے لیے اپنا اثرورسوخ استعمال کریں۔ انہوں نے کہا کہ وہ تنازع کے فریقین سے مسلسل رابطے میں ہیں اور ان سے کشیدگی میں کمی لانے اور مذاکرات کی میز پر واپس آنے کا مطالبہ کیا ہے۔ انہوں نے مزید کہا کہ اقوام متحدہ شراکت داروں کے ساتھ اپنی کوششیں جاری رکھے گا تاکہ جلد از جلد لڑائی کو مستقل طور پر روکا جا سکے۔ انہوں نے شہری علاقوں پر اندھا دھند بمباری کی شدید مذمت کی۔ انہوں نے کہا کہ میں فریقین سے مطالبہ کرتا ہوں کہ وہ گنجان آباد علاقوں میں جنگی کارروائیاں بند کریں اور انسانی امداد کی بلا روک ٹوک کارروائیوں کی اجازت دیں۔