Raza Musani 
سری نگر : حریت رہنما یاسین ملک کی سزا کیخلاف مقبوضہ کشمیر میں مکمل ہڑتال کی گئی۔ سرینگر کے تجارتی مرکز لال چوک سمیت شہر کے بیشتر علاقوں میں ہڑتال کے باعث تجارتی سرگرمیاں معطل ہو گئیں ٹرانسپورٹ معطل رہی۔ بھارتی حکام کی تاجروں، دکانداروں اور ٹرانسپورٹروں کو کاروبار بند رکھنے کی صورت میں سنگین نتائج کی دھمکیوں کے باوجود ہڑتال کی گئی ۔ قابض حکام نے لوگوں کو عدالتی فیصلے کے خلاف مظاہرے کرنے سے روکنے کے لیے پورے علاقے میں بھارتی فوجیوں، پیراملٹری فورسز اور پولیس اہلکاروں کو تعینات کیا تھا۔ یاسین ملک کے گھر کے باہر بھی مظاہرہ کیا گیا ہے جس میں شامل خواتین نے آزادی کے حق میں نعرے بازی کی۔بھارتی پولیس نے ضلع کپواڑہ میں ڈیموکریٹک حریت فرنٹ کے چیئرمین چوہدری شاہین اقبال سمیت حریت رہنمائوں اور کارکنوں کے گھروں پر چھاپے مارے۔ فورسز کے اہلکاروں نے ڈی ایچ ایف لیڈر کے والدین اور دیگر اہلخانہ کو ہراساں کیا اور ان کے موبائل فون چھین لئے۔
