Raza Musani 
غزہ : اسرائیلی فوج نے شمالی، جنوبی، وسطی غزہ اور رفح میں فضائی حملوں کی رفتار بڑھا دی ہے۔ صیہونی فوج کے درندگی اور سفاکی کے اس نئے سلسلے میں النصیرات کے علاقے میں درجنوں فلسطینیوں کو شہید کیا گیاہے۔ گزشتہ چوبیس گھنٹوں میں اسرائیلی فوج کے حملوں میں مزید ستانوے فلسطینی شہید ہوئے ہیں۔
سات اکتوبر سے جاری اسرائیلی درندگی میں 35 ہزار تین سو سے زائد فلسطینی شہید ہوچکے ہیں۔ رفح اور شمالی غزہ پر اسرائیل زمینی اور فضائی حملے کررہا ہے۔ شمالی غزہ میں رہنے والے ہر فلسطینی کو اسرائیلی فوج نے اپنا ٹارگٹ قرار دے دیا ہے اور ایک بار پھر انتباہ کیا ہے کہ فلسطینی فوری طور پر جبالیہ اور زیتون کا علاقہ خالی کردیں۔ اسرائیلی فوج نے رفح کے مشرقی اور وسطی علاقوں پر بھی فضائی حملے کیے ہیں جس میں کئی عمارتیں تباہ ہوگئیں.
فلسطینی وزارت صحت کے مطابق شہادتوں کا حساب لگانا دشوار ہوگیا ہے۔ بیک وقت کئی علاقوں سے اموات کی خبریں آئی ہیں۔ فلسطینی وزارت صحت کے مطابق غزہ کا یورپین اسپتال بھی ایندھن نہ ہونے کے باعث مریضوں کو سہولت فراہم کرنے سے قاصر ہوگیا ہے۔ آئی سی یو میں داخل متعدد مریض اور انکوبیٹروں میں لیٹے ہوئے نومولود سخت تکلیف میں دم توڑ گئے ہیں۔
