Raza Musani 
جدہ پاکستان سمیت آٹھ ممالک نے غزہ کے لیے عارضی فلسطینی ٹیکنوکریٹ کمیٹی کے قیام کا خیرمقدم کیا ہے۔ اور اس بات پر زور دیا ہے کہ اس کمیٹی کو علاقائی رابطے کو برقرار رکھتے ہوئے روزمرہ شہری امور سنبھالنا ہوں گے۔
پاکستان، مصر، اردن، سعودی عرب، قطر، ترکیہ، انڈونیشیا اور متحدہ عرب امارات کے وزرائے خارجہ نے مشترکہ بیان جاری کیاہے۔ بیان میں کہا گیا ہے کہ غزہ کے انتظام کے لیے نئی اعلان کردہ کمیٹی، ایک وسیع تر امن منصوبے کے دوسرے مرحلے میں مرکزی کردار ادا کرے گی۔ بیان میں کہا گیا ہے کہ وزراء اس بات کی اہمیت پر زور دیتے ہیں کہ قومی کمیٹی فوری طور پر غزہ کے عوام کے روزمرہ امور کی نگرانی شروع کرے، مغربی کنارے اور غزہ کی پٹی کے درمیان ادارہ جاتی اور علاقائی ربط کو محفوظ رکھے، غزہ کے اتحاد کو یقینی بنائے، اور اسے تقسیم کرنے کی کسی بھی کوشش کو مسترد کرے۔
