Raza Musani 
غزہ : اسرائیلی فوج نے غزہ سٹی۔ شمالی اور وسطی غزہ میں بمباری اور فائرنگ کرکے مزید چھ فلسطینی شہید اور کئی زخمی کردئے۔ اسرائیلی فوج نے غزہ سٹی کے النصر محلے میں ہولی فیملی اسکول کے قریب رہائشی اپارٹمنٹ کونشانہ بنایا۔ حملے میں باپ بیٹی سمیت چار افراد شہید اور متعدد زخمی کردئے گئے۔ اسی دوران غزہ سٹی کے مشرقی علاقوں پر بھی شدید گولہ باری کی گئی۔
غزہ سٹی کے مشرق میں جبل السورانی پر تعینات اسرائیلی فوجی گاڑیوں نے شدید فائرنگ کی، جس سے متعدد فلسطینی زخمی ہوئے۔ ادھر شمالی غزہ کے علاقے بیت لاہیا میں اسرائیلی فوج کی فائرنگ سے ایک فلسطینی شہید ہوا۔ وسطی غزہ کے علاقے دیر البلاح میں اسرائیلی فائرنگ سے ایک کسان شہید ہو گیا۔
غزہ کے محکمہ فرانزک کے مطابق جنگ کے آغاز سے اب تک ملبے سے ملی گیارہ سو انتیس لاشوں کی شناخت نہ ہوسکی ۔اس کی وجہ فرانزک آلات کی شدید قلت اور ڈی این اے ٹیسٹنگ پر پابندی ہے۔
