سری لنکن شہری پریانتھا کمارا قتل کیس میں 6 مجرموں کو سزائے موت، 9 کو عمر قید, 72 کو قید کی سزا

لاہور : لاہور کی انسداد دہشت گردی عدالت نے سیالکوٹ میں سری لنکن شہری پریانتھا کمارا قتل کیس میں 6 مجرموں کو 2 بار سزائے موت سنادی، جن میں تیمور، عبدالرحمان، محمد ارشد، علی حسین، ابو طلحہ اور محمد حمیر شامل ہیں۔عدالت نے 9 مجرموں کو عمر قید کی سزاسنائی، جن میں روحیل امجد، محمد شعیب، احتشام، عمران ریاض، ساجدامین، ضیغم مہدی، علی حمزہ، لقمان حیدر اور عبدالصبور شامل ہیں۔عدالت نے 72 مجرمان کو 2،2 سال اور ایک مجرم علی اصغر کو 5 سال قید کی سزا سنائی ہے جبکہ کیس کے ایک ملزم بلال کو الزام ثابت نہ ہونے پر بری کردیا ہے۔ عدالت نے کیس کا ٹرائل کوٹ لکھپت جیل میں مکمل کیا اور مجرمان کو سزائیں سنائیں۔عدالت نے 89 ملزمان پر فرد جرم عائد کی تھی۔دوران سماعت ملزمان نے صحت جرم سے انکار کرتے ہوئے کیس کےدفاع کا فیصلہ کیا تھا، عدالت نے 14 مارچ بروز پیر پراسیکیوشن کے 14 گواہوں کو طلب کیا پراسیکیورٹر نے عدالت کو بتایا کہ بالغ اور نابالغ ملزمان کے خلاف علیحدہ چالان جمع کرائے گئے، 80 نامزد ملزمان بالغ ہیں جبکہ 9 نابالغ ہیں۔پراسیکیویشن نے 46 چشم دید گواہوں کو چالان کا حصہ بنایا تھا جبکہ 10 سی سی ٹی وی کیمروں کی فوٹیج بھی کیس کا حصہ تھی، 55 ملزمان کے موبائل سے ویڈیوز بھی ملی تھیں۔ملزمان پر فرد جرم عائد ہونے کے بعد روزانہ کی بنیاد پر تیز ترین ٹرائل ایک ماہ میں مکمل کیا گیا۔سیالکوٹ میں 3 دسمبر کو توہین مذہب کے الزام میں سینکڑوں افراد نے فیکٹری کے سری لنکن منیجر کو تشدد کرکے قتل کیا اور اُس کی لاش جلادی تھی۔