غزہ پر حملوں میں 56 فلسطینی شہید، 7 اجتماعی قبروں سے سربریدہ لاشیں برآمد

غزہ : غزہ پر اسرائیلی حملے جاری ہیں۔ رفح، بیت حنون، جبالیہ اور وسطی غزہ میں فضائی حملوں اور گولہ باری سے چھپن افراد شہید اور کئی زخمی ہوگئے۔ شمالی غزہ کے شہر جبالیہ کو اسرائیلی فوج نے مکمل تباہ کردیا ہے۔ جبالیہ کو ملبے کا ڈھیر بناکر فوج نکل گئی ہے۔ اقوام متحدہ کے مطابق جبالیہ میں کوئی عمارت محفوظ نہیں رہی ہے۔دیر البلاح پر بھی اسرائیل فوج نے بمباری کی ہے۔ چند گھنٹوں میں اسرائیلی فوج کے حملوں میں مزید 56 فلسطینی شہید ہوگئے ہیں۔القسام بریگیڈ اور القدس بریگیڈ نے اسرائیلی فوجیوں کے خلاف رفح میں چھاپہ مارکارروائیاں تیز کردی ہیں۔ القسام نے کئی اسرائیلی ٹینک تباہ کردیئے ہیں۔ القدس بریگیڈ نے اسرائیلی فوج کے ایک کیمپ کو نشانہ بنایا ہے جس میں متعدد اسرائیلی فوجی ہلاک و زخمی ہوگئے ہیں۔
ادھر غزہ کے تین اسپتالوں سے مزید سات اجتماعی قبریں دریافت ہوئی ہیں۔ الشفا اسپتال سے تین،العدوان اسپتال سے تین اور ایک اجتماعی قبر النصیرات اسپتال کے احاطے سے ملی ہے۔ تینوں اسپتالوں میں اسرائیلی فوج نے قتل عام کے بعد کئی افراد کو زندہ دفن کردیا تھا۔ اجتماعی قبروں سے تیس ایسی لاشیں بھی ملی ہیں جن کے سر نہیں ہیں۔ فلسطینی وزارت صحت نے اجتماعی قبروں کی تحقیقات کا مطالبہ کیا ہے اور اسے جنگی جرم قرار دیا ہے۔