کویٹہ میں ہزارہ برادری کی گاڑی پر فائرنگ 4 افراد شہید

کویٹہ : ہزارہ برادری کا قتل عام پھر شروع کر دیا گیا. افغانستان کے بعد کوئٹہ میں ہزارہ برادری کو نشانہ بنایا گیا۔ ہزار گنجی میں صبح سویرے سبزی فروشوں کی گاڑی پر موٹر سائیکل سواروں نے فائرنگ کردی جس سے 4 افراد شہید اور 2 زخمی ہو گئے۔ ترجمان پولیس کے مطابق لاشوں اور زخمیوں کو سول اسپتال کوئٹہ منتقل کر دیا گیا ہے، جب کہ واقعے کے خلاف مغربی بائی پاس پر احتجاج کیا گیا جس سے ٹریفک کی روانی معطل ہو گئی، مظاہرین نے ملزمان کی فوری گرفتاری کا مطالبہ کیا ۔ صوبائی وزیر داخلہ میر ضیا اللہ لانگو نے واقعے پر دکھ اور افسوس کا اظہار کرتے ہوئے کہا کہ واقعے میں ملوث افراد قانون کے گرفت سے نہیں بچ سکیں گے، انھوں نے اسپتال انتظامیہ اور محکمہ صحت کے حکام کو ہدایت کی کہ زخمیوں کو بہتر طبی امداد فراہم کی جائے۔