Raza Musani 
غزہ : فلسطینی قیدیوں کے حقوق کی تنظیم نے انکشاف کیا ہے کہ غزہ سے اغوا کیے گئے تقریباً دو ہزار فلسطینی اسرائیلی جیلوں میں شدید تشدد کا سامنا کر رہے ہیں۔
اسریٰ میڈیا آفس کے مطابق غزہ سے اغوا کیے گئے یہ قیدی ان چودہ ہزار سے زائد فلسطینیوں میں شامل ہیں جنہیں اسرائیلی فوجی جارحیت کے دوران گرفتار کیا گیا۔ بیان میں کہاگیا کہ اسرائیلی جیلوں اور حراستی مراکز،جن میں اوفر،نقب، سدے تیمان اور راکفیت شامل ہیں، میں قیدیوں کو غیر انسانی حالات میں رکھا جارہا ہے۔ رپورٹ کے مطابق متعدد قیدیوں کو طویل عرصے تک کمبل اور گدوں کے بغیر رکھا جاتا ہے، جس سے سردیوں میں ان کی تکلیف میں شدید اضافہ ہو جاتا ہے۔ تنظیم کے مطابق قیدیوں کو جان بوجھ کر فاقہ کشی کا نشانہ بنایا جا رہا ہے اور انہیں اتنی کم خوراک دی جاتی ہے جو بنیادی غذائی ضروریات بھی پوری نہیں کرتی۔
