سعودیہ میں ڈرون ٹکرانے سے 2 افراد جاں بحق، 12 زخمی

تہران : ایران نے اسرائیل اور خلیجی ممالک میں امریکی اہداف پر حملوں کی نئی لہر کے دوران قطر، بحرین، سعودی عرب اور متحدہ عرب امارات کو نشانہ بنایا ہے۔ سعودی عرب میں دو افراد جاں بحق جبکہ اسرائیل اور قطر میں اڑتیس افراد زخمی ہوگئے۔ ایرانی پاسدارن انقلاب نے 24 گھنٹوں میں 4 امریکی میزائل شکن دفاعی ریڈار تباہ کرنے کا دعویٰ کر دیا۔ سعودیہ میں رہائشی عمارت سے ڈرون ٹکرانے سے دو افراد جاں بحق. بارہ زخمی ہوئے۔ بحرین میں امریکی اڈے پربڑے پیمانے پر حملوں میں بتیس افراد زخمی ہوگئے۔ متحدہ عرب امارات میں الفجیرہ میں آئل انڈسٹری زون میں آگ بھڑک اٹھی، اماراتی حکام کے مطابق آگ ڈرون کا ملبے گرنے کے باعث لگی ۔ قطر کے دارالحکومت دوحہ پر ایران کے میزائل حملے کی اطلاعات سامنے آئی ہیں جہاں رات تین بجے کے قریب خطرے کی سطح بڑھائی گئی اور چند منٹ بعد فضا میں زور دار دھماکوں کی آوازیں سنائی دیں۔ بحرین کے علاقے سترہ کے قریب ڈرون حملوں میں بتیس بحرینی شہری زخمی ہوئے۔ سعودی عرب کی وزارتِ دفاع کے مطابق صحرائے ربع الخالی میں واقع شیبہ آئل فیلڈز کو نشانہ بنانے والے کئی ڈرون مار گرائے گئے۔ کویت کے سبیہ پاور اور واٹر پلانٹ میں لگی آگ پر قابو پا لیا گیا۔ ادھر تل ابیب پر بیلسٹک میزائل حملے نے بڑے پیمانے پر تباہی مچادی۔ حملے میں چھ افراد زخمی ہوئے۔