Raza Musani 
انقرہ: انیس ممالک کے وزرائے خارجہ نے مقبوضہ مغربی کنارے میں فلسطینی اراضی پر غیرقانونی کنٹرول بڑھانے کے اسرائیلی اقدامات کی شدید مذمت کی ہے۔ اور اسے عملی الحاق قرار دیا ہے۔
ترکیہ، قطر، فرانس اور برازیل سمیت انیس ممالک کے وزرائے خارجہ نے ایک مشترکہ بیان پر دستخط کیے جس میں کہا گیا ہے کہ مقبوضہ مغربی کنارے میں اراضی کی رجسٹریشن شروع کرنے کا منصوبہ ان فلسطینیوں کی زمین ضبط کرنے کا ذریعہ بنے گا جو ملکیت ثابت نہیں کر پائیں گے۔ ترک وزارت خارجہ سے جاری مشترکہ بیان میں اسرائیلی اقدامات کو الحاق قرار دیتے ہوئے خبردار کیا گیا ہے کہ یہ اقدامات فلسطینی ریاست کے قیام کے امکانات پر کاری ضرب ہیں۔ مشترکہ اعلامیے پر سعودی عرب اور مصر کے علاوہ عرب لیگ اور اسلامی تعاون تنظیم کے سربراہان نے بھی دستخط کیے۔ بیان میں کہا گیا کہ ان تبدیلیوں کے تحت فلسطینی اراضی کو نام نہاد اسرائیلی ریاستی زمین قرار دیا جا رہا ہے اور غیرقانونی صیہونی آبادکاروں کی سرگرمیوں کو تیز کیا جا رہا ہے۔ اعلامیے میں متنبہ کیا گیا کہ یہ اقدامات 1967 سے مقبوضہ فلسطینی علاقوں، بشمول مشرقی یروشلم، کی قانونی و انتظامی حیثیت اور آبادی کے تناسب کو مستقل طور پر تبدیل کر سکتے ہیں۔
