Raza Musani 
ویانا : انسانی حقوق کی تنظیموں نے یمن پر جارح ممالک سے معافی مانگنے اور یمن کو پہنچنے والے نقصان کا ازالہ کرنے کا مطالبہ کیا ہے۔ 137 تنظیموں اور اداروں نے مشترکہ بیان میں کہا ہے کہ عالمی برادری اور خاص طور پر اقوام متحدہ اور متعلقہ اداروں کی خاموشی اور بے حسی کی وجہ سے یمن کیخلاف جارحانہ جنگ ہو رہی ہے۔ان اداروں کی خاموشی کی وجہ سعودی عرب اور متحدہ عرب امارات سے ملنے والی مالی امداد کے منقطع ہونے کا خوف ہے۔ یمنی اداروں اور انسانی حقوق کی تنظیموں کے اعداد وشمار بتاتے ہیں کہ یمن میں گزشتہ سات برسوں میں جنگی جرائم، جارحیت اور انسانیت کے خلاف جرائم کا ارتکاب کیا گیا ہے۔انسانی حقوق اور سول سوسائٹی کی تنظیموں نے بھی دنیا کے آزاد منش انسانوں اور انسانی حقوق کے حامیوں سے یمن کے خلاف جنگ کے خاتمے کے لیے دباؤ ڈالنے کا مطالبہ کیا۔ بیان میں جارح ممالک کی طرف سے جنگ کے خاتمے اور یمن خاص طور پر الحدیدہ کی بندرگاہ اور صنعا بین الاقوامی ہوائی اڈے کے محاصرے کے فوری خاتمے اور اس ملک میں کھانے پینے کی اشیاء، ادویات، طبی آلات اور سامان کے داخلے پر بھی زور دیا ہے۔
