ہم مزاحمتی دور میں ہیں،اسرائیل آگ سے کھیلنا بند کردے، سید حسن نصراللہ

فوجی تصادم نہیں چاہتے لیکن جنگ میں دھکیلا گیا تو پہلے سے زیادہ ٹھوس جواب ملے گا، اسرائیلی ایسے واقعات دیکھیں گے جو۸۴۹۱کے بعد کبھی نہیں دیکھے ہوں گے
یمن جنگ کی امریکی حمایت کا خاتمہ یمنی عوام کی استقامت کا نتیجہ ہے، امریکاداعش کو پھر سے زندہ کرنے کی کوشش نہ کرے
بیروت(نیوز ڈیسک) حزب اللہ کے سربراہ سید حسن نصراللہ نے صہیونی حکومت کو خبردار کیا ہے کہ وہ آگ سے نہ کھیلے،اس کی لبنان کے خلاف کسی بھی جارحیت کا مزاحمتی تحریک کی جانب سے بھر پور جواب دیا جائے گا، حزب اللہ فوجی محاذ آرائی کی خواہاں نہیں لیکن اگر اسے جنگ میں دھکیلا گیا تو وہ پہلے سے کہیں زیادہ ٹھوس مزاحمت کا مظاہرہ کرے گی،انہوں نے کہا کہ اسرائیل نے کبھی بھی بین الاقوامی قانون کی پاسداری نہیں کی اور جنگوں کے دوران شہروں کو تباہ اور شہریوں کو ہلاک کیا ہے، حسن نصراللہ نے کہا کہ ہم محاذ آرائی کے خواہاں نہیں لیکن ہم اپنے شہدا کا خون کبھی نہیں بھولتے ہیں، اگر تصادم ہوا تو ہم اس کا بھرپور جواب دیں گے، اگر تم نے ہمارے شہروں پر حملہ کیا تو ہم بھی ایسا کریں گے، اگر تم نے ہمارے دیہات کو نشانہ بنایا تو ہم آپ کی بستیوں پر بمباری کریں گے،انہوں نے رواں ماہ کے آغاز پر لبنانی سرحد کے ساتھ اسرائیلی جنگی مشقوں کا حوالہ دیتے ہوئے قابض حکومت کو ڈرانے دھمکانے سے خبردار کیا اور کہا کہ جنگی مشقیں اسرائیلیوں کے لئے ایک خطرناک کھیل ثابت ہوں گی اور اس کے تباہ کن نتائج برآمد ہوں گے،انہوں نے کہا کہ اگر جنگ شروع ہوئی تو اسرائیلی ایسے واقعات دیکھے گا جو اس نے1948 کے بعد سے کبھی نہیں دیکھے ہوں گے، لہذا وہ آگ سے کھیلنا بند کردے، ہم مزاحمتی دور میں ہیں، انہوں نے یمن جنگ کی امریکی حمایت کا خاتمہ یمنی عوام کی استقامت کا نتیجہ اور سعودی و اسرائیلی حکام کیلئے باعث تشویش قرار دیا، انہوں نے امریکا کی نئی حکومت کو بھی وارننگ دی ہے کہ وہ داعش کو پھر سے زندہ کرنے کی کوشش نہ کرے، انقلاب بحرین کی جانب اشارہ کرتے ہوئے انہوں نے کہا کہ بحرین کا انقلاب ایک ایسے وقت اپنے دسویں سال میں داخل ہوا ہے کہ اس ملک کے حکمرانوں نے اس ملک کو صہیونی حکومت کے ساتھ تعلقات کو معمول پر لائے جانے کے مرکز میں تبدیل کردیا ہے، حزب اللہ کے سربراہ نے کہا کہ ایران علاقے کی بڑی طاقت میں تبدیل ہوچکا ہے، اسلامی انقلاب کی کامیابی کو 42 سال ہوچکے ہیں اور اس دوران ایران تمام شعبوں میں اپنی استقامت و پائیداری کی بدولت علاقے کی ایک بڑی طاقت بن چکا ہے کہ جس کی مرضی کے بغیر ایک تنکا بھی نہیں توڑا جاسکتا، انہوں نے کہا ہمیں بھی علاقے اور لبنان میں اپنے استقامتی منصوبوں کو آگے بڑھانے کے لئے شہید عماد مغنیہ کے افکار و نظریات کو پروان چڑھانے کی ضرورت ہے۔