عراقی وزیراعظم کی کابینہ تشکیل،تمام گروپس کا اتفاق

22رکنی کابینہ میں 11وزراتیں شیعہ جماعتوں، 6اہلسنت اور5 کردوں کے لئے مختص ہوں گی،کردوں سے مذاکرات کیلئے مصطفی الکاظمی کردستان جائیں گے
مصطفیٰ الکاظمی کابینہ کے نام آئندہ ہفتے صدر کو پیش کریں گے، الکاظمی کردستان کے حقوق، سابقہ حکومت کے ساتھ سمجھوتے اور آئین کے پابند ہیں،ڈپٹی اسپیکر
بغداد(نیوزڈیسک)عراقی سیاسی جماعتوں نے مصطفی الکاظمی کی نامزدگی کی توثیق کردی، مصطفی الکاظمی نے تمام سیاسی جماعتوں سے مشاورت کے بعد اپنی کابینہ تشکیل دے دی ہے جس کے نام وہ آئندہ ہفتے صدر کو پیش کریں گے،سیاسی فریقوں نے مذاکرات کے عمل پر اطمینان کا اظہارکیا،کابینہ 22ارکان پر مشتمل ہوگی جس میں 11وزراتیں شیعہ جماعتوں، 6اہلسنت اور5 کردوں کے لئے مختص ہوں گی،پارلیمنٹ کے ڈپٹی اسپیکر بشیر الحداد نے کہا ہے کہ مصطفی الکاظمی کی کابینہ کی توثیق و حمایت کے مسئلے پر پارلیمانی اور سیاسی سطح پراتفاق پایا جاتا ہے، کردوں نے الکاظمی کے ساتھ مذاکرات کیلئے کوئی پیشگی شرط نہیں رکھی ہے، الکاظمی کردستان کے حقوق، عادل عبد المہدی حکومت کے ساتھ اربیل کے سمجھوتے اور آئین کے پابند ہیں،ادھر کردستان پٹریاٹک یونین کے رکن طہ امین نے کہا ہے کہ مصطفی الکاظمی کابینہ کے وزرا کا تعین کرنے کے لئے سیاسی فریقوں کے ساتھ صلاح و مشورے کو آگے بڑھائیں گے اور جلد ہی کا بینہ کے ارکان پر مشاورت کیلئے کردستان کا دورہ کریں گے۔