سعودی عرب: رواں سال حج کے لیے تین پیکیجز کی منظوری

جدہ: سعودی وزارت حج و عمرہ کی جانب سے رواں سال حج کے لیے 3 حج پیکیجز کی منظوری دی گئی ہے۔ سعودی وزارت حج و عمرہ کے مطابق پہلا پیکیج "گیسٹ اسپیشل ٹاور”، جس کی فیس 16 ہزار 560 ریال فی کس ہے۔ اس پیکیج میں عازمین کو منیٰ ٹاورز میں رہائش، خدمات، مکہ سے مشاعر مقدسہ آمدورفت شامل ہوگی۔ دوسرا پیکیج "گیسٹ اسپیشل خیمہ” ہے، جس کی فیس 14 ہزار 381 ریال فی کس مقرر ہے۔ دوسرے پیکیج میں عازمین کو جمرات کے قریب خیموں میں بسایا جائے گا۔ سعودی وزارت حج و عمرہ کے مطابق تیسرا حج پیکیج "گیسٹ عوامی خیمہ” ہے، جس کی فیس 12 ہزار 113 ریال فی کس ہے۔ وزارت کے مطابق ان تمام پیکیجز کی ادائیگی کے وقت ویلیو ایڈڈ ٹیکس کی رقم علیحدہ وصول کی جائے گی۔ وزارت حج و عمرہ کی ویب سائٹ پر حج درخواستیں وصول ہونے کا عمل شروع ہوگیا ہے۔