Ilyas 
بہترین والدین کیسے بنیں
محبت و شفقت کا اظہار
بچوں کے لیے والدین کے جذبۂ محبت و شفقت کا اظہار انہیں اعتماد اور ذہنی آسودگی فراہم کرنے کا باعث بنتا ہے۔ اسے چاہیے کہ وہ اس جذبے کا اظہار کرتے ہوئے ان کی حوصلہ افزائی کرے اور انہیں یہ یقین دلائے کہ وہ ان سے غیر مشروط محبت کرتی ہے۔
بچوں کو توجہ سے سننا
بچوں کے معاملات میں دلچسپی لیں اور ان کی بات کو توجہ سے سنیں اور ان کی زندگی میں خود کو شریک رکھیں۔ اگر بچے کسی الجھن یا پریشانی کا شکار ہیں تو ان کی پریشانی کو دور کرنے اور انہیں مطمئن کرنے کی ہر ممکن کوشش کریں۔
نظم و ضبط کا قیام
بچوں کو تحفظ کا احساس فراہم کرتے ہوئے گھر میں نظم و نسق کو قائم کریں۔ ہر کام کے لیے وقت معین کریں مثلا بچوں کو سلانے، کھلانے اور کھیل کود کا وقت بتائیں تاکہ وہ اپنے بچپن ہی سے وقت کی قدر کرنا سیکھیں اور نظم و ضبط کے مطابق زندگی گزارنے کے عادی ہو جائیں۔
تعریف و توصیف
بچوں کے اچھے عمل پر ان کی خوب تعریف اور حوصلہ افزائی کریں۔ بچوں کا موازنہ دوسرے بچوں خصوصا بہن بھائیوں کے ساتھ نہ کریں کیوں کہ ہر بچه منفرد اور جدا اہمیت کا حامل ہوتا ہے۔ انہیں یہ احساس دلائیں کہ منفرد و جدا ہونا اچھی بات ہے۔ موازنہ کرنے سے بچے احساس کمتری کا شکار ہو جاتے ہیں۔
بلا وجہ تنقید سے گریز
بچوں پر بلا وجہ تنقید اور نکتہ چینی کرنے سے احتراز برتا جائے۔ اگر بچے کسی ناپسندیدہ فعل کے مرتکب ہو بھی جائیں تو انہیں پیار سے سمجھائیں کہ ایسا رویہ ناقابل قبول ہے۔ ملامتی جملے مثلا تم بہت برے ہو، میری نظروں سے دور ہو جاؤ وغیرہ استعمال نہ کریں۔ انہیں دوسروں کے سامنے شرمندہ نہ کریں بلکہ علیحدہ لے جا کر اپنی ناپسندیدگی کا اظہار کریں اور پیار سے سمجھائیں۔
