اپنی سرزمین کسی کیخلاف استعمال نہیں ہونے دیں گے، پاکستان

وزیر خارجہ شاہ محمود قریشی کا ایران، سعودی عرب،متحدہ عرب امارات اور ترکی کے وزرائے خارجہ سے ٹیلی فونک رابطہ،حالیہ صورت حال پر گہری تشویش کا اظہار
اپنی سرزمین کسی کے خلاف استعمال ہونے نہیں دیں گے، خطے میں مختلف ممالک کے درمیان کشیدگی کم ہونی چاہئے، ڈائیلاگ سے آگے بڑھنا چاہئے،پاک فوج
اسلام آباد (نیوز ڈیسک)عراقی سرزمین پر امریکی حملے میں ایرانی جنرل قاسم سلیمانی کی شہادت کے بعد وزیر خارجہ شاہ محمود قریشی نے ایران، سعودی عرب،متحدہ عرب امارات اور ترکی کے وزرائے خارجہ سے ٹیلی فونک رابطہ کرکے تبادلہ خیال کیا، وزیرخارجہ شاہ محمود قریشی نے حالیہ صورت حال پر گہری تشویش سے آگاہ کرتے ہوئے تنازع سے بچنے اور کشیدگی کو کم کرنے کیلئے تحمل کا مظاہرہ کرنے پر زور دیا، شاہ محمود قریشی نے‘تمام فریقین کو یو این چارٹر کے مطابق پرامن طریقے سے اختلافات کا حل کرنے کی یادہانی کروائی،وزیرخارجہ نے ٹیلی فونک گفتگو میں خطے کے وزرائے خارجہ کو’یقین دلایا کہ پاکستان خطے کے کسی بھی تنازع کا حصہ نہیں بنے گا اور اپنی سرزمین کسی قیمت پر بھی کسی بھی دوسری ریاست کے خلاف استعمال ہونے نہیں دے گا، دفتر خارجہ نے امریکی حملے پر روایتی بیان جاری کیا اور کہا کہ دونوں فریق تحمل کا مظاہرہ کریں،دوسری جانب فوج کے شعبہ تعلقات عامہ (آئی ایس پی آر) کے ترجمان میجر جنرل آصف غفور نے بتایا کہ امریکی وزیر خارجہ کی آرمی چیف سے بات چیت ہوئی ہے، آرمی چیف نے مائیک پومپیوسے گفتگو میں کہا کہ خطہ خراب حالات سے بہتری کی طرف جا رہا ہے، میجر جنرل آصف غفور نے کہا ہے کہ ایرانی جنرل پر حملے کے بعد خطے کے حالات میں تبدیلی آئی ہے، اپنی سرزمین کسی کے خلاف استعمال ہونے نہیں دیں گے، خطے میں مختلف ممالک کے درمیان کشیدگی کم ہونی چاہئے، ڈائیلاگ سے آگے بڑھنا چاہئے۔