انتخابی مہم کا حصہ بنانے پر امارات اسرائیلی وزیراعظم پر برہم

 اسرائیلی وزیراعظم کا 10ارب ڈالر سرمایہ کاری کا دعویٰ، وہ دوطرفہ تعلقات کو اپنی الیکشن مہم کا حصہ بنا رہے ہیں جو قبول نہیں،اماراتی ولی عہد ناراض
 متحدہ عرب امارات نیتن یاہو کی الیکشن مہم کا حصہ نہیں بننا چاہتا، اماراتی وزیرخارجہ، عرب ممالک اور اسرائیل کی ابوظبی میں طے شدہ کانفرنس ملتوی
 ابوظبی(نیوز ڈیسک)عرب امارات نے دوطرفہ تعلقات کو اسرائیلی وزیراعظم بنیامین نیتن یاہو کی انتخابی مہم کا حصہ بنانے پر شدید ناراضی کا اظہار کیا ہے اور اسرائیل اور دیگر عرب ریاستوں کے ساتھ ابوظبی میں طے شدہ کانفرنس کو فی الحال ملتوی کر دیا ، ابوظبی کے ولی عہد شیخ محمد بن زید النہیان نے ناراضی کا اظہار کرتے ہوئے کہا کہ اسرائیلی وزیراعظم متحدہ عرب امارات کے ساتھ تعلقات کی بحالی کو اپنی الیکشن مہم کا حصہ بناکر استعمال کر رہے ہیں،انہوں نے بنیامین نیتن یاہو کے انتخابی ریلی میں اسرائیل میں عرب امارات کی 10ارب ڈالر کی سرمایہ کاری کے دعوے پر بھی شدید برہمی کا اظہار کیا ،اماراتی وزیر خارجہ کا کہنا ہے کہ یو اے ای اسرائیل کے کسی بھی انتخابی عمل کا ابھی اور کبھی بھی حصہ نہیں بنے گا ، اسرائیلی میڈیا کا کہنا ہے کہ متحدہ عرب امارات نیتن یاہو کی الیکشن مہم کا حصہ نہیں بننا چاہتا جس کی وجہ سے اسرائیلی وزیراعظم سے مطالبہ کیا گیا ہے کہ وہ الیکشن تک اپنا دورہ ملتوی کر دیں ، اسرائیلی میڈیا کے مطابق متحدہ عرب امارات کی جانب سے کانفرنس اپریل میں رکھی گئی تھی جس میں اسرائیلی وزیراعظم نیتن یاہو نے بھی شرکت کرنا تھی،نیتن یاہو نے ریڈیو پر خطاب میں کہا کہ وہ 23 مارچ کے بعد الیکشن کے خاتمے پر خلیجی ملک کا دورہ کریں گے اور وہ الیکشن سے قبل ابوظہبی نہیں جائیں گے بلکہ الیکشن کے بعد ہی دورہ کریں گے، اب تک اسرائیلی وزیراعظم کئی بار یو اے ای کا دورہ ملتوی کر چکے ہیں