اقوام متحدہ میں شام کے مستقل مندوب بشار جعفری نے مقبوضہ جولان کے خلاف امریکی ووٹنگ کی مذمت کرتے ہوئے اس فیصلے کو غیرقانونی ، غیر اخلاقی اور بین الاقوامی قوانین اور اقوام متحدہ کے منشور کی کھلی خلاف ورزی قرار دیا ہے۔ بشار جعفری نے کہا کہ امریکہ کا بیت المقدس کو اسرائیل کا دارالحکومت تسلیم کرنا، یہودی کالونیوں کی تعمیر کی حمایت کرنا اور سینچری ڈیل منصوبے کو عملی جامہ پہنانا عالمی قوانین کی خلاف ورزی میں تمام حدود پار کرنا ہے۔
واضح رہے کہ اقوام متحدہ کی جنرل اسمبلی نے بدھ کو ایک بار پھر مقبوضہ جولان سے صہیونی حکومت کے باہر نکلنے کے بل کو بھاری اکثریت سے منظور کر لیا ۔مقبوضہ جولان سے صہیونی حکومت کے باہر نکلنے سے متعلق اس بل کی حمایت میں ایک سو بیالیس ووٹ پڑے جبکہ انیس اراکین نے ووٹنگ میں حصہ نہیں لیا اور صرف امریکہ و صہیونی حکومت نے اس بل کی مخالفت میں ووٹ ڈالے۔
صہیونی حکومت نے انیس سو سڑسٹھ میں جولان کے پہاڑی علاقوں میں شام کی تقریباً ایک ہزار دو سو مربع کلومیٹر زمینوں پر قبضہ کر لیا تھا اور کچھ عرصے بعد اس علاقے کو اپنے مقبوضہ علاقوں میں ضم کر لیا ۔
