یوم علی ؑپر پروگراموں کا معاملہ طے کرلیا جائیگا،وفاقی وزیر

صوبائی حکومتوں کے متعصبانہ اور بلاجواز اقدامات کا نوٹس لیا جائے، راجہ ناصر عباس
اسلام آباد (نیوز ڈیسک) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری اور وزیر مذہبی امور نور الحق قادری کے درمیان ٹیلفونک رابطہ ہوا ہے جس میں یوم علیؑ کی مجالس اور جلوسوں پر بات چیت کی گئی ہے،علامہ راجہ ناصر عباس نے وفاقی وزیر کو بتایا کہ حکومتی سطح پر اجلاس میں یہ بات طے شدہ تھی کہ ایس او پیز کے مطابق جلوس و عزاداری کے پروگراموں میں کسی قسم کی رکاوٹ نہیں آئے گی لیکن اب صوبائی حکومتیں رکاوٹ پیدا کرنے کے لئے مختلف حیلے بہانے تراش رہی ہیں، وفاقی حکومت کو چاہیے کہ وہ صوبائی حکومتوں کے متعصبانہ اور بلاجواز اقدامات کا نوٹس لے اور انہیں ایسے غیر سنجیدہ فیصلوں سے باز رکھا جائے۔وفاقی وزیر مذہبی امور نے یقین دلایا کہ مذہبی رواداری اور باہمی احترام ان کی ترجیحات کا حصہ ہے اور بہت جلداجلاس بلا کر یہ معاملہ بھی بخوبی طے کر لیا جائے گا۔