پنجاب میں 85 کالعدم تنظیموں اور ذیلی اداروں پر قربانی کی کھالیں جمع کرنے پر پابندی

لاہور : محکمہ داخلہ پنجاب نے 85 کالعدم تنظیموں، ان کے ذیلی اداروں اور زیر نگرانی تنظیموں پر قربانی کی کھالیں جمع کرنے پر پابندی عائد کرتے ہوئے واضح کیا ہے کہ عوام اپنی زکوۃ، خیرات، عطیات اور کھالیں صرف پنجاب چیرٹی کمیشن سے منظورشدہ اداروں اور تنظیموں کو دیں، عوام کو انتباہ کیا گیا ہے کہ انسداد دہشتگردی ایکٹ 1997ء کے تحت کالعدم تنظیموں، ان کے ذیلی اداروں اور زیر نگرانی تنظیموں کو کسی بھی قسم کی معاونت فراہم کرنا جرم ہے۔ محکمہ داخلہ پنجاب کی جانب سے کالعدم تنظیموں اور ان کے ذیلی اداروں کی جاری کردہ فہرست میں شامل تنظیموں میں لشکر جھنگوی، سپاہ محمد پاکستان، جیش محمد (ذیلی تنظیمیں الرحمت ٹرسٹ بہاولپور، الفرقان ٹرسٹ کراچی)، لشکر طیبیہ، سپاہ صحابہ پاکستان، تحریک نفاذ شریعت محمدی، تحریک اسلامی، القاعدہ، ملت اسلامیہ پاکستان (سابقہ سپاہ صحابہ پاکستان)، خدام الاسلام (سابقہ جیش محمد)، جمعیت الانصار، جماعت الفرقان، حزب التحریر شامل ہیں۔