فلسطینی مزاحمت کاروںنے اسرائیل کے ہوش ٹھکانے لگادئے

اسرائیلی حملے کے دو گھنٹے کے اندر صہیونی بستیوں پر راکٹ باری، 2 کو اسرائیل نے گرادیا باقی غیر آباد علاقوں پر گرے،حملہ اسرائیلی کارروائی کے جواب میں کیا گیا
 فلسطینی شہری بیت المقدس میں تنہا نہیں ، بیت المقدس صہیونی حکومت کے سامنے گھٹنے نہیں ٹیکے گا اور نسل پرستانہ پالیسیوں کو ہرگز تسلیم نہیں کرے گا،حماس کا اعلان
غزہ (نیوز ڈیسک) فلسطینی مزاحمت کاروں نے اسرائیل کوا ینٹ کا جواب پتھر سے دے کر ہوش ٹھکانے لگادئے، مزاحمت کاروں نے غزہ سے صہیونی بستیوں پر 10 راکٹ فائر کیے، یہ راکٹ اسرائیل کی غزہ پر بمباری کے صرف 2 گھنٹے بعد ہی داغے گئے، راکٹوں میں سے 2 کو اسرائیل نے گرادیا جبکہ دیگر راکٹ اسرائیل کے غیر رہائشی علاقوں پر گرے ، جوابی کارروائی سے چند گھنٹے قبل صہیونی حکومت کے توپ خانوں نے مشرقی غزہ کے علاقے البریج پر گولہ باری کی تھی، توپوں کے گولوں سے القرارہ علاقے میں واقع زرعی اراضی کو بھی نشانہ بنایا گیا، جنگی طیاروں ، ہیلی کاپٹروں ، ڈرون طیاروں اور توپخانوں نے حالیہ مہینوں میں غزہ پٹی کے مختلف علاقوں کو نشانہ بنایا ہے، حماس کے سیاسی شعبے کے سربراہ اسماعیل ہنیہ نے زور دے کر کہا ہے کہ بیت المقدس صہیونی حکومت کے سامنے گھٹنے نہیں ٹیکے گا اور اس کی نسل پرستانہ پالیسیوں کو ہرگز تسلیم نہیں کرے گا ، اس وقت بیت المقدس میں جو کچھ ہو رہا ہے وہ غصب شدہ علاقے میں رہنے والی ایک قوم اورایک غاصب حکومت کے درمیان ارادوں کی جنگ ہے ، فلسطینی شہری بیت المقدس میں تنہا نہیں بلکہ سب کے سب مل کراپنی سرزمین ، مقدس مقامات اور اپنے عوام کا دفاع کریں گے جنھیں غاصب صہیونی حکومت مٹانا اور تباہ و برباد کردینا چاہتی ہے، فلسطینی عوام اس جنگ میں بھی کامیاب ہوں گے۔