Raza Musani 
کابل : طالبان نے افغانستان اور تاجکستان کی مرکزی سرحدی راہداری پر قبضہ کرلیا ہے ، افغان سیکیورٹی فورسز نے چیک پوسٹیں خالی کردی ہیں جبکہ کچھ اہلکار سرحد پار فرار ہوگئے، شیر خان بندر کے علاقے پر قبضہ مئی میں امریکی افواج کے حتمی انخلاء کے آغاز کے بعد سے یہ طالبان کی سب سے بڑی کامیابی ہے ،شیر خان بندر کا علاقہ قندوز شہر سے صرف 50 کلو میٹر کی دوری پر واقع ہے، قندوز کی صوبائی کونسل کے رکن خالد دین حاکمی نے بتایا کہ منگل کی صبح ڈیڑھ گھنٹے کی لڑائی کے بعد بدقسمتی سے طالبان نے شیر خان پورٹ، علاقے اور تاجکستان سے ملحقہ تمام چیک پوسٹوں پر قبضہ کرلیا ہے۔ افغان فوج کے ایک آرمی افسر نے بتایا کہ ہمیں تمام چیک پوسٹیں چھوڑنے پر مجبور کیا گیا جبکہ ہمارے کچھ اہلکار سرحد پار کرکے تاجکستان چلے گئے۔ اپنا نام ظاہر نہ کرنے کی شرط پر انہوں نے بتایا کہ طالبان کے سینکڑوں جنگجو ہر جگہ موجود تھے،طالبان کے ترجمان ذبیح اللہ مجاہد نے تصدیق کرتے ہوئے بتایا کہ ان کے جنگجوئوں نے سرحدی چیک پوسٹوں پر قبضہ کرلیا ہے۔ انہوں نے کہا کہ ہمارے مجاہدین نے شیر خان بندر اور تاجکستان سے ملحقہ تمام چیک پوسٹوں پر قبضہ کرلیا ہے۔
