خلیج فارس میں امریکا اور ایران آمنے سامنے آگئے

ایرانی جنگی کشتیوں نے راستہ روکا، امریکی دعویٰ پر ایران کا انتبا ہ
تہران (نیوز ڈیسک) سپاہ پاسداران انقلاب اسلامی نے امریکا کوخلیج فارس میں ہر قسم کی مہم پسندی کے نتائج سے خبردار کیا ہے، امریکی حکام نے دعوی کیا تھاکہ 12اپریل کو سپاہ پاسداران انقلاب اسلامی کی بارہ جنگی کشتیوں نے شمالی خلیج فارس میں امریکی جنگی بحری جہازوں کے راستے میں رکاوٹیں ڈالیں، جنگی کشتیاں بڑی تیز رفتاری کے ساتھ، بہت قریب سے امریکی جنگی جہازوں کے سامنے سے گزری ہیں، پاسداران انقلاب کے شعبہ تعلقات عامہ نے امریکی فوجیوں کی ہالی وڈ اسٹائل کی اس داستان کے بارے میں کہا ہے کہ امریکی بحریہ نے انتہائی خطرناک اور غیر پیشہ ورانہ طریقے سے ایرانی کشتیوں کا راستہ روکا لیکن پھر سامنے سے ہٹنے پر مجبور ہو گئی، سپاہ پاسداران انقلاب کے بحری یونٹ نے دہشت گرد امریکی بحریہ کے غیر قانونی اقدامات اور مہم پسندی کو لگام دینے کیلئے سمندری حدود میں گشت بڑھا دیاہے۔