Raza Musani 
لاہور: جامعہ عروۃ الوثقیٰ کے سربراہ علامہ سید جواد نقوی نے ٹرمپ کو انتہائی بدبخت شخص قرار دیتے ہوئے اس کے ممکنہ دورہ پاکستان پر حکومت کو سخت انتباہ کیا ہے۔ علامہ جواد نقوی نے کہا کہ حکومت ٹرمپ کے دورے کو سہولت فراہم نہ کرے۔ علامہ جواد نقوی نے ایران کے خلاف امریکا اور اسرائیل کی جارحیت کی شدید مذمت کی۔ انہوں نے کہاکہ ٹرمپ کا پاکستان آنا کوئی اعزاز نہیں، وہ ایک بدبخت شخص، جھوٹا مسیحا اور گناہگار ہے۔ مولانا نے کہا کہ یورپ، نیٹو اور خود امریکا کے اندر بھی ٹرمپ پر تنقید ہو رہی ہے۔ پاکستان کو اسے ہیرو نہیں بنانا چاہیے اور نہ ہی اسے پاکستان، ایران یا امت مسلمہ کے مقابل کھڑا ہونے دینا چاہیے۔ پاکستان کے ممکنہ ثالثی کردار کا حوالہ دیتے ہوئے انہوں نے قیادت کو خبردار کیا کہ وہ ٹرمپ کے مقاصد کے ساتھ ہم آہنگ نہ ہو۔ انہوں نے کہا کہ پاکستان کو یہ موقع ملا ہے۔ دعا ہے کہ قیادت غلطی نہ کرے اور ان مذاکرات میں ٹرمپ کو کامیاب بنانے کی کوشش نہ کرے۔ نہ ہی اسے خوش کرنے کی کوشش کی جائے۔ علامہ جواد نقوی نے حکام پر زور دیا کہ وہ مزاحمت کا حوصلہ دکھائیں اور پاکستان کو ایسے متنازع شخصیت کے استقبال کا مرکز نہ بننے دیں۔ انہوں نے پاکستان کو پاک سرزمین قرار دیتے ہوئے کہا کہ اسے ایسی شخصیت کی میزبانی نہیں کرنی چاہیے۔
