وفاق المدارس الشیعہ پاکستان کے نائب صدر علامہ سید مرید حسین نقوی نے حکومت اور اپوزیشن کے فلسطین پر مشترکہ موقف کو قابلِ تعریف قرار دیتے ہوئے کہا ہے کہ مظلوم فلسطینیوں کی ہر قسمی مدد اور حمایت دینی فریضہ ہے، اسلامی جمہوری ایران کی طرح عرب ممالک بھی کُھل کر فلسطین کا ساتھ دیں، وزیر اعظم عمران خان، او آئی سی کو اسلامی حمیّت کے تقاضوں کے مطابق اقدام کرنے کیلئے رابطہ کریں۔ مولانا مرید نقوی نے فلسطینی مجاہدین کی مدد، متاثرین کی آبادکاری اور زخمیوں کے علاج معالجہ کیلئے قومی فنڈ قائم کرنے کا مطالبہ کرتے ہوئے تمام مسالک کے علماء اور عوام سے فلسطین میں جاری بحران میں مکمل یکجہتی کا ثبوت دینے کی اپیل بھی کی اور کہا کہ مظلومین کی کامیابی اور خونخوار اسرائیل کی تباہی کے لئے محافلِ دعا منعقد کی جائیں۔ انہوں نے افسوس کا اظہار کیا کہ فلسطین میں جاری جنگ میں مغربی میڈیا فلسطین کا زیادہ نقصان ظاہر کرکے اسرائیل کی برتری ثابت کرنا چاہتا ہے۔ ہمارا اسلامی میڈیا مجاہدین کے جوابی حملوں سے ہونیوالے نقصانات اور اسرائیل کے خوف و ہراس کو بھی واضح کرے۔ حماس کے مجاہدین نے اسرائیل کا شدید نقصان کیا ہے۔ پہلی بار اسرائیل کو مجاہدین کے ہاتھوں عبرتناک مزاحمت کا سامنا ہے۔ امت مسلمہ کے مورال کو بلند رکھنے کیلئے اسلامی میڈیا اپنا کردار ادا کرے۔
