ترکیہ: ملبے سے 101 گھنٹے بعد ایک ہی خاندان کے 6 افراد کو زندہ نکال لیا گیا

انقرہ: ترکیہ میں عمارت کے ملبے سے خاندان کے چھ افراد کوایک سو ایک گھنٹے بعد زندہ نکال لیا گیا۔ ترکیہ اور شام میں جہاں ہرطرف تباہی کی داستانیں بکھری ہوئی ہیں وہیں معجزات بھی رونما ہورہے ہیں۔ ترکیہ کے علاقے اسکندرون میں امدادی کارکنوں نے منہدم عمارت سے چھ افراد کو 101 گھنٹے گزرنے کے بعد نکال لیا۔ ایک ہی گھر کے چھ افراد منہدم ڈھانچے کے اندر باقی چھوٹی سے جگہ میں اکھٹے ہوکر زندگی کی جدوجہد کرتے رہے۔ باہر نکالے جانے پر انہوں نے مسرت کا اظہار کیا۔ اس سے قبل بھی کئی عمارتوں سے بچوں سمیت کئی افراد کو کئی کئی گھنٹے بعد نکالا گیا ہے۔ تاہم اب زلزلے کے چار دن گذرنے کے بعد ملبے تلے دبے افراد کی زندگی کی امید دم توڑ رہی ہے۔ ادھر 15سالہ مردہ بیٹی کا ہاتھ تھامے شہری کی تصویر نے دیکھے والوں کو رلا دیا ہے باپ کا کہنا ہے کہ وہ ملبے سے لاش نکلنے تک ہاتھ نہیں چھوڑے گا۔