ادلب آپریشن پر ترک پارلیمنٹ میں ہاتھاپائی

اپوزیشن کی تنقید حکومتی ارکان کو برداشت نہ ہوئی، ہنگامہ شروع کردیا
دمشق(نیوز ڈیسک) شام کے صوبہ ادلب میں فوج بھیجنے پر ترک پارلیمنٹ میں شدید ہنگامہ آرائی ہوئی، ارکان پارلیمنٹ نے ایک دوسرے پر لاتوں اور گھونسوں کی بارش کر دی،حکمراں جماعت جسٹس اینڈ ڈولپمنٹ پارٹی اور حزب اختلاف کے ارکان کے درمیان ادلب میں جاری جنگ کے مسئلے پر زبردست بحث ہوئی جس کے بعد دونوں فریق نے ایک دوسرے پر الزامات عائد کئے اور نوبت مار پیٹ تک جا پہنچی،حزب اختلاف کے رہنما انجین اوزکوتش نے صدر رجب طیب اردوان کی پالیسیوں پر شدید نکتہ چینی کی جس کے بعد ماحول گرم ہو گیا، انہوں نے کہا کہ اردوان کی نظر میں ترک فوجیوں کی کوئی اہمیت اور احترام نہیں، وہ ائیر کور کے بغیر فوجیوں کو جنگ کے لئے آگے بھیج رہے ہیں جس کی وجہ سے فوجی ہلاک ہو رہے ہیں خطاب کے ختم ہوتے ہی حزب اختلاف کے رہنماؤں کو حکمراں جماعت کے ارکان نے گھیر لیا اور مارپیٹ شروع کر دی۔