Ilyas 
کادونا حراستی مرکز میں حالیہ واقعات نے تشویش کو درست ثابت کردیا، شیخ ابراہیم اور ان کی اہلیہ کو کادونا کی جیل میں رکھنا غلط اقدام ہے،اسلامی تحریک
ہائی کورٹ شیخ زکزاکی کی گرفتاری کو غیر قانونی اور غیرآئینی قرار دے چکی ہے، نقصان پہنچا تو اس کی ذمہ دار مرکزی حکومت ہوگی،متعلقہ حکام سے اپیل
ابوجا(نیوز ڈیسک) اسلامی تحریک نائیجیریا نے آیت اللہ شیخ ابراہیم زکزاکی کی زندگی کولاحق نئے خطرات پر سخت تشویش کا اظہار کیا ہے،اسلامی تحریک کے میڈیا ترجمان ابراہیم موسیٰ نے ایک بیان میں شیخ ابراہیم کو کادونا حراستی مرکز میں رکھنے پر تشویش کا اظہار کرتے ہوئے کہا کہ حراستی مرکز میں پیش آنے والے حالیہ واقعات نے تحریک کی تشویش کو درست ثابت کردیا ہے،انہوں نے کہا کہ شیخ ابراہیم اور ان کی اہلیہ کو کادونا کی جیل میں رکھنا غلط اقدام ہے، انہوں نے تمام متعلقہ حکام سے اپیل کی کہ وہ شیخ ابراہیم اور ان کی اہلیہ کا تحفظ یقینی بنائیں، انہوں نے خبردار کیا کہ اگر شیخ ابراہیم اور ان کی اہلیہ کو نقصان پہنچا تو اس کی ذمہ دار مرکزی حکومت ہوگی،حکومت کی ذمہ داری ہے کہ وہ تمام قیدیوں کا تحفظ کرے خاص طور پر ایسی حالت میں جبکہ پوری دنیا میں کورونا وائرس کی وبا پھیلی ہوئی،انہوں نے کہا کہ شیخ ابراہیم کا کیس دوسرے قیدیوں سے مختلف ہے کیونکہ ہائی کورٹ ان کی گرفتاری کو غیر قانونی اور غیرآئینی قرار دے چکی ہے، ان کا مقدمہ دو مختلف عدالتوں میں زیر سماعت ہے اور ان ہی الزامات کے تحت 200افراد کو بے گناہ قرار دیکر رہا کیا جاچکا ہے۔
