Raza Musani 
بیت المقدس: صیہونی آبادکاروں نے ایک بار پھر مسجد الاقصیٰ اور دیگر مذہبی مقامات پر دھاوا بول دیا۔ آباد کاروں نے اتوار کی رات مقبوضہ مغربی کنارے کے شہر سلفیت کے قصبے کفل حارث میں اسلامی مقامات پردھاوا بولا۔ کِفل حارث میونسپلٹی کے سربراہ اسامہ صالح نے بتایا کہ صیہونی آبادکاروں نے علاقے میں تلمودی رسوم ادا کیں۔ پولیس نے فلسطینیوں کی مداخلت روکنے کیلئے سخت ناکہ بندی کر رکھی تھی۔ چند گھنٹوں بعد آج صبح پھر درجنوں صیہونی آباد کار اسرائیلی پولیس کےجھرمٹ میں مغربی گیٹ کی جانب سے مسجد اقصیٰ میں گھس گئے۔ آباد کاروں نے مسجد کے صحنوں میں اشتعال انگیز دورے کیے اور باب الرحمہ کے علاقے میں تلمودی رسمیں ادا کیں۔ پولیس نے شدت پسندوں کی دراندازی کو محفوظ بنانے کے لیے مسجد اقصیٰ کے صحنوں اور اس کے دروازوں پر اپنی اسپیشل فورسز اور یونٹس کو تعینات کردیا تھا۔ ادھر صیہونی فورسز نے مغربی کنارے کے المغیر گاؤں سے 15 شہریوں کو گرفتار کر لیا۔
