Raza Musani 
رام اللہ : مغربی کنارے میں صیہونی آبادکاروں نے حملے کرکے فلسطینیوں کے گھروں، گاڑیوں اور کھیتوں کو آگ لگا دی۔ حماس نے آباد کاروں کے حملوں کو منظم دہشت گردی قرار دیا ہے۔
صیہونی آبادکاروں نے مغربی کنارے کے کئی دیہات میں حملے کئے اور توڑ پھوڑ کی۔ یہ حملے فلسطینی کی گاڑی سے ایک آبادکار کی ہلاکت کے بعد شروع ہوئے۔ آبادکاروں کے واٹس ایپ گروپس میں انتقام کی مہم چلانے کی کال دی گئی، جس کے بعد مختلف علاقوں میں آبادکاروں نے بیس سے زائد حملے کئے۔ آبادکاروں نے حملے کرکے گھروں، گاڑیوں اور کھیتوں کو آگ لگا دی۔ اقوام متحدہ کے مطابق یکم مارچ سے اب تک آبادکاروں کے حملوں میں چھ فلسطینی ہلاک ہو چکے ہیں۔
حماس رہنما محمود مرداوی نے مقبوضہ مغربی کنارہ میں آباد کاروں کے حملوں کو قابض حکومت کی سرپرستی میں ہونے والی منظم دہشت گردی قراردیا ہے اور کہا ہےکہ آباد کاروں کی جانب سے قتل و غارت، آتش زنی اور خوف و ہراس پھیلانے کے جرائم اپنے ان اہداف کو حاصل نہیں کر سکیں گے۔ فلسطینیوں کو ان کی سرزمین سے بے دخل کرنے کے تمام منصوبے ناکام ثابت ہوں گے۔
