Raza Musani 
جدہ: اسلامی تعاون تنظیم نے مقبوضہ فلسطینی علاقوں میں صیہونی آبادکاری کو اقوام متحدہ کی قراردادوں کی سنگین خلاف ورزی قرار دیا ہے۔ او آئی سی سیکریٹریٹ سے جاری بیان میں القدس الشریف سمیت مقبوضہ فلسطینی سرزمین میں ایک ہزار سے زائد نئے مکانات کی تعمیر کے لیے ٹینڈر دینے کی شدید مذمت کی گئی ہے۔او آئی سی نے اس بات پر زور دیا کہ نوآبادیاتی آباد کاری کی پالیسی غیر قانونی ہے اور یہ بین الاقوامی قوانین اور اقوام متحدہ کی متعلقہ قراردادوں کی سنگین خلاف ورزی ہے۔ او آئی سی نے بین الاقوامی برادری سے مطالبہ کیا کہ وہ بین الاقوامی قراردادوں کو نافذ کرنے میں اپنی ذمہ داریوں کو نبھائے اور قابض اسرائیل پر دباؤ ڈالیں کہ وہ فلسطینی عوام، ان کی سرزمین اور مقدسات پر حملوں کو روکے۔
دوسری جانب خلیج تعاون کونسل نے اسرائیلی وزیرخزانہ کے متنازع بیان پر امریکی وزیرخارجہ انٹونی بلنکن کو خط لکھ دیا جس میں واشنگٹن سے مطالبہ کیا ہے کہ وہ فلسطینی عوام کو نشانہ بنانے والے تمام اقدامات اور بیانات کا جواب دینے میں اپنی ذمہ داریاں ادا کرے۔ اور اسرائیل فلسطین تنازع کے منصفانہ، جامع اور دیرپا حل تک پہنچنے میں اپنا کردار ادا کرے۔
