Raza Musani 
نابلس : صیہونی فوج نے مقبوضہ فلسطینی علاقے میں ایک اور کم عمر نوجوان کو شہید اور دو کو زخمی کردیا۔ مغربی کنارے کے قصبے عزون میں اسرائیلی فوجی گاڑی داخل ہوئی تو نوجوانوں نے اس پر پتھراؤ کیا۔ صیہونی فوجیوں نے مظاہرین پر براہ راست فائرنگ کردی جس سے 15 سالہ محمد نیدل سلیم شہید اور دو نوجوان زخمی ہوگئے۔ جن میں ایک بچہ بھی شامل ہے جس کی حالت نازک ہے۔ دوسری جانب صیہونی آباد کاروں نے ایک بار پھر مقبوضہ مغربی کنارے پر دھاوا بول دیا۔آبادکاروں نے غیر قانونی ایویاتر چوکی کی طرف جاتے ہوئے مغربی کنارے کے شمال میں گزرنے والی گاڑیوں پر پتھراؤ کیا۔ آبادکاروں کے حملوں کے بعد فلسطینیوں نے اپنی آبادیوں کی رات میں پہرے داری شروع کردی ہے۔
