یمنی فوج اور انصار اللہ کا ریاض سمیت تین شہروں میں فوجی مراکز پر حملہ

دفاعی توازن 4 آپریشن کے تحت سعودی وزارت دفاع، انٹیلی جنس ہیڈکوارٹرزاور ریاض، جیزان اور نجران میں کئی فوجی مراکز کو کامیابی کے ساتھ نشانہ بنایا گیا
حملے کو ناکام بناکر ملک کو بڑی تباہی سے بچالیا،سعودی حکام،یہ آپریشن عظیم یمنی قوم کے خلاف شدید سعودی محاصرے اور مجرمانہ جنگی اقدامات کا جواب ہے،ترجمان
صنعا (نیوز ڈیسک) یمنی فوج اور انصار اللہ نے سعودی دارلحکومت ریاض سمیت تین شہروں میں فوجی مراکز پر حملے کرکے ایک بار پھر آل سعود میں کھلبلی مچادی ، دفاعی توازن 4 آپریشن کے تحت سعودی وزارت دفاع، انٹیلی جنس ہیڈکوارٹرز ، سلمان ایئربیس سمیت ریاض، جیزان اور نجران میں کئی فوجی مراکز کو کامیابی کے ساتھ نشانہ بنایا ، آپریشن میں ڈرون طیاروں کے ساتھ ساتھ "قدس” اور "ذوالفقار” نامی بیلسٹک و کروز میزائلوں کا بھی استعمال کیا گیا،سعودی حکام نے حملے کی تصدیق کرتے ہوئے اسے ناکام بنانے کا دعویٰ کیا ، سعودی ترجمان کے مطابق یمن سے 3 میزائل اور 8 ڈرونز کو فضا میں ہی تباہ کر کے ایک بڑے حملے کو ناکام بنا دیا، ملک کو بڑی تباہی سے بچالیاتاہم یمنی مسلح افواج کے ترجمان جنرل یحیی سریع نے بتایا کہ جارح سعودی عرب کے اہم فوجی و حساس مراکز کیخلاف یہ آپریشن عظیم یمنی قوم کے خلاف شدید سعودی محاصرے اور مجرمانہ جنگی اقدامات کا جواب ہے ، جب تک یمن کا سرحدی محاصرہ اور یمن کے خلاف ہونے والے جارحانہ اقدامات ختم نہیں کر دیئے جاتے اور یمن کی آزادی اور خودمختاری بحال نہیں ہو جاتی، جارح قوتوں کے خلاف اس سے بھی بڑھ کر شدید اور قوی آپریشنز جاری رہیں گے۔