برسوں بعد ہیضہ تباہ کن شکل میں واپس آگیا ہے، اقوام متحدہ

نیویارک : اقوام متحدہ کے ماہرین صحت نے خبردار کیا کہ برسوں کے مسلسل زوال کے بعد ہیضہ تباہ کن شکل میں واپس آگیا ہے۔ ورلڈ ہیلتھ آرگنائزیشن اور یونیسیف نے ایک نئے الرٹ میں کہا ہے کہ مزید ممالک کو ہیضے کی وباء کا سامنا ہے کیسز کی بڑھتی ہوئی تعداد سے پتہ چلتا ہے کہ صورتحال گذشتہ دس سال کے مقابلے بدتر ہے۔ یونیسیف کے پبلک ہیلتھ ایمرجنسی یونٹ کے سربراہ جیروم فافمین زمبرونی نے کہا کہ وبائی بیماری ہمارے سامنے غریبوں کو مار رہی ہے۔ انہوں نے کہا کہ گزشتہ سال مئی تک 15 ممالک میں کیسز رپورٹ ہوئے تھے لیکن اس سال مئی کے وسط تک 24 ممالک میں کیس رپورٹ ہوچکے ہیں اور موسمی تبدیلی کے ساتھ کیسز میں اضافہ متوقع ہے۔ انہوں نے کہا کہ گذشتہ دہائیوں میں بیماری پر قابو پانے میں پیشرفت کے باوجود ہمیں پیچھے جانے کا خطرہ ہے۔ 43 ممالک میں ایک ارب سے زیادہ افراد متاثر ہونے کا خدشہ ہے۔