Raza Musani 
کابل : طالبان نے افغانستان میں وسیع البنیاد حکومت کے قیام کیلئے سیاسی مذاکرات شروع کردئے ہیں تاکہ حکومت کوتسلیم کرانے کیلئے عالمی برادری کی شرط کو پورا کیا جاسکے اس سلسلے میں طالبان کے 2 رہنماؤں نے حزب اسلامی افغانستان کے سربراہ گلبدین حکمتیار سے ملاقات کی۔ نگراں وزیر خارجہ مولوی امیر خان متقی اور پاکستان میں طالبان کے خصوصی ایلچی سردار احمد خان گلبدین حکمتیار اور ان کے قریبی ساتھیوں سے ملنے انکی رہائشگاہ پہنچے, ملاقات میں فریقین نے افغانستان کے سیاسی، اقتصادی، سماجی اور سیکیورٹی مسائل پر تبادلہ خیال کیا۔ طالبان کی حکومت کو باضابطہ طور پر تسلیم کئے جانے کیلئے مختلف تنظیموں کی جانب سے ایک وسیع البنیاد حکومت کی تشکیل کی شرط عائد کی گئی ہے ۔ طالبان انتظامیہ، جسے یورپ اور امریکا کی دشمنانہ پالیسیوں کی بنا پر کافی اقتصادی مسائل و مشکلات کا سامنا ہے، اب سیاسی اختلافات ختم اور تمام اقوام کی شمولیت سے ایک وسیع البنیاد حکومت تشکیل دینے کی کوشش کر رہی ہے۔
