لبنانی بھائیوں کو کبھی تنہا نہیں چھوڑیں گے، ایرانی صدر

تہران : ایرانی صدر مسعود پزشکیان نے لبنان کے خلاف اسرائیلی کارروائیوں پر سخت ردعمل دیتے ہوئے کہا کہ صہیونی ریاست کی جانب سے بار بار کی جارحیت جنگ بندی کے ابتدائی معاہدے کی کھلی خلاف ورزی ہے اور یہ دھوکے اور وعدوں کی عدم پاسداری کا خطرناک اشارہ ہے۔ انہوں نے کہا کہ اگر یہ حملے جاری رہے تو مذاکرات بے معنی ہو جائیں گے۔ ان کا کہنا تھا کہ ایران ہر وقت تیار ہے اور اپنے لبنانی بھائیوں اور بہنوں کو کبھی تنہا نہیں چھوڑے گا۔ مسعود پزشکیان نے مزید کہا کہ اسرائیل کی جانب سے لبنان میں نئی دراندازی بھی جنگ بندی کی صریح خلاف ورزی ہے، جو اس بات کی نشاندہی کرتی ہے کہ معاہدوں کے حوالے سے سنجیدگی اور دیانتداری کا فقدان ہے۔ انہوں نے خبردار کیا کہ ایسے اقدامات جاری رہے تو خطے میں امن کی کوششیں شدید متاثر ہوں گی۔