اصول پسند بھاری اکثریت سے کامیاب، دشمن کی پروپیگنڈہ مہم کے باوجود انتخابات میں عوام کی بھرپور شرکت قابل قدر ہے(ولی امر مسلمین)

دوسوسے زائد نشستوں پر اصول پسند16پر اصلاح پسند کامیاب،53 آزاد امیدوار کامیاب، باقی نشستوں پر دوبارہ الیکشن ہوگا
انتخابات میں عوام کو شرکت سے روکنے کیلئے تشہیراتی مہم اور پروپیگنڈہ کئی ماہ قبل شروع ہوگیا تھا،سازشوں کو ناکام بنانے کے لئے سب کو تیار رہنا چاہئے،ولی امر مسلمین
تہران (نیوز ڈیسک) ایران کے پارلیمانی الیکشن میں اصول پسندوں نے میدان مار لیا،پارلیمنٹ کی دوسو سے زائد نشستوں کیلئے ڈالے گئے ووٹوں کی گنتی مکمل ہوگئی، ڈھائی کروڑ کے قریب ووٹرز نے اپنا حق رائے دہی استعمال کیا، وزیرداخلہ عبدالرضا رحمانی فضلی نے بتایا کہ ووٹنگ کی شرح 42.57 فیصد رہی، انہوں نے انقلاب کے بعد کم ترین شرح کی وجہ کرونا وائرس کو قراردیا، غیر سرکاری نتائج کے مطابق اصول پسندوں نے 178 نشستوں پر کامیابی حاصل کرلی، 53 آزاد امیدوار کامیاب ہوئے جبکہ اصلاح پسند صرف 16 نشستیں ہی جیت سکے، باقی نشستوں پر کوئی امیدوار مقررہ کم سے کم 20فیصد ووٹ حاصل نہیں کرسکا لہذا ان حلقوں میں دوبارہ پولنگ ہوگی، ولی امرمسلمین آیت اللہ سید علی خامنہ ای نے انتخابات کے بڑے امتحان میں دشمنوں کی موقع پرستی اور پروپیگنڈے کو ناکام بنانے پر ایرانی عوام کی تعریف کی ہے اور کہا کہ ملک کے مختلف ستونوں اور اداروں کو نقصان پہنچانے کی دشمن کی سازشوں کے مقابلے میں سب کو ہوشیار اور ان سازشوں کو ناکام بنانے کے لئے سب کو تیار رہنا چاہئے، درس خارج دیتے ہوئے ولی امرمسلمین نے کہاکہ انتخابات میں ایرانی عوام کو شرکت سے روکنے کی اغیارکی منفی تشہیراتی مہم اور پروپیگنڈہ کئی ماہ قبل شروع ہوگیا تھا اور انتخابات کی تاریخ قریب آنے پر ان میں شدت پیدا ہوگئی، انتخابات سے دو روز قبل تو کورونا وائرس کے بہانے اغیار کی پروپیگنڈہ مشینریوں اور ذرائع ابلاغ نے ایرانی عوام کو انتخابات میں شرکت سے روکنے کے لئے کوئی بھی کسر باقی نہیں رکھی اس کے باوجود انتخابات میں بھرپور شرکت پر خداوند متعال کا شکر گذار اور عوام کو سراہتے ہیں،انہوں نے کہا کہ ایرانی عوام سے دشمن کی عداوت صرف معیشت، ثقافت اور عوام کے دینی اور انقلابی عقائد و اقدار تک محدود نہیں بلکہ وہ ایرانی عوام کے انتخابات کے بھی مخالف ہیں، کیونکہ دشمن نہیں چاہتے کہ دین کے نام پر اور انقلاب کی حفاظت کے لئے پولنگ اسٹیشنوں پر عوام کی شرکت ایک حقیقت میں تبدیل ہو، انہوں نے کہاکہ اسلامی جمہوری نظام میں انتخابات کا انعقاد دشمنوں کے اس دعوے پر خط بطلان کھینچ دیتا ہے کہ دین آزادی اور جمہوریت کا مخالف ہے، ایران میں انتخابات اس بات کا منہ بولتا ثبوت ہیں کہ دین ھمہ جانبہ جمہوریت کا مظہر کامل ہے۔