حالیہ واقعات ایرانی عوام کی عظمت و وقار کا واضح ثبوت ہیں، ولی امر مسلمین

پچھلے دنوں کے واقعات،شہادتیں، ایران کی فوجی طاقت کا اظہاراور میدان میں عوام کی غیر معمولی شرکت ایک تاریخ ساز حقیقت کے رونما ہونے کی علامتیں ہیں
انقلاب کا اگلا قدم اس حقیقت کو منزل کمال تک پہنچا سکتا ہے اور آپ لوگ ان تاریخ ساز اور منتخب افراد میں شامل ہوسکتے ہیں،یورپ میں زیر تعلیم طلبا کو پیغام
تہران(نیوز ڈیسک) ولی امر مسلمین آیت اللہ سید علی خامنہ ای نے کہاہے کہ پچھلے دنوں کے غیر معمولی اور تاریخ ساز واقعات ایران اور اس کے انقلابی عوام کی عظمت و وقار کا واضح ثبوت ہیں، یورپ میں اعلی تعلیم کے حصول میں مصروف ایرانی طلبا کی اسلامی انجمنوں کی یونین کے اجلاس کے نام اپنے پیغام میں ولی امر مسلمین نے کہاکہ پچھلے دنوں کے اہم ترین واقعات،شہادتیں، ایران کی فوجی طاقت کا اظہاراور میدان میں عوام کی غیر معمولی شرکت اور موجودگی یہ سب ایک تاریخ ساز حقیقت کے رونما ہونے کی علامتیں ہیں، انقلاب کا اگلا قدم اس حقیقت کو منزل کمال تک پہنچا سکتا ہے اور آپ لوگ ان تاریخ ساز اور منتخب افراد میں شامل ہوسکتے ہیں،انہوں نے کہاکہ عظیم کمانڈروں کی شہادتیں، ان کے جلوس جنازہ میں عوام کی تاریخی شرکت، ایران کی فوجی اور دفاعی طاقت کا مظاہرہ، نوجوانوں کا مضبوط ارادہ اور جذبہ محکم، سائنس و ٹیکنالوجی کے میدان میں سرگرم مومن جوانوں کے ساتھ مل کر آج کی دنیا میں ایک غیر معمولی اور تاریخی حقیقت رقم کرسکتا ہے ایسی حقیقت جو آئندہ کی تاریخ کے لئے گہرے اور فیصلہ کن اثرات کی حامل ہوسکتی ہے۔