Raza Musani 
پیرس: فرانس میں صدر میکرون کی متنازع پنشن اصلاحات کے خلاف احتجاج پرتشدد شکل اختیار کرگیا۔ فرانس میں مسلسل چوتھے ہفتے دارلحکومت پیرس، نیس، اور مارسیلے سمیت مختلف شہروں میں لاکھوں افراد نے ریٹائرمنٹ کی عمر بڑھانے کے خلاف ریلیاں نکالیں اور مظاہرے کئے۔ پیرس میں پولیس کی جانب سے رکاوٹ ڈالنے پر احتجاج پرتشددد شکل اختیارکرگیا۔ مظاہرین کو قابو کرنے کے لیے پولیس نے آنسو گیس کا بے دریغ استعمال کیا۔ مشتعل مظاہرین نے متعدد دکانوں میں توڑ پھوڑ کی اور کئی گاڑیوں اور املاک کو آگ لگا دی۔ پولیس اور مظاہرین کے درمیان جھڑپوں کے باعث سڑکیں میدان جنگ کا منظر پیش کرنے لگیں۔ احتجاج کے باوجود صدر میکرون نے ایک مرتبہ پھر اصلاحات نافذ کرنے کے عزم کا اظہار کیا اور احتجاج کرنے والی یونینز سے اپیل کی کہ وہ ذمہ داری کا مظاہرہ کرتے ہوئے احتجاج ترک کردیں صدر نے ریٹائرمنٹ کی عمر 62 سے بڑھا کر 64 سال کرنے کا فیصلہ کیا ہے جس کی سختی سے مخالفت کی جارہی ہے۔
