Raza Musani 
اسلام آباد: ہیومن رائٹس کونسل آف پاکستان نے اڈیالہ جیل کے باہر پیش آنے والے تشدد کے واقعے کی سخت الفاظ میں مذمت کی ہے۔ بیان میں کہا گیا ہے کہ علامہ راجہ ناصر عباس سابق وزیراعظم عمران خان کی بہنوں سے اظہارِ یکجہتی کے لیے اڈیالہ جیل کے باہر موجود تھے۔ ہائی پریشر واٹر کے ذریعے ان کی پگڑی اتارنا مذہبی آزادی، انسانی وقار اور بنیادی حقوق کی صریح خلاف ورزی ہے۔ کونسل نے کہا کہ یہ اقدام اظہارِ رائے کی آزادی اور پُرامن اجتماع کے حق پر بھی حملہ ہے، جو پاکستان کے آئین اور بین الاقوامی انسانی حقوق کے قوانین کے تحت محفوظ ہیں۔ کونسل نے مطالبہ کیا ہے کہ اس واقعے کے ذمہ دار عناصر کے خلاف فوری اور شفاف کارروائی کی جائے۔ بیان میں مذہبی شخصیات، خواتین اور پُرامن مظاہرین کے تحفظ پر زور دیا گیا ہے۔ ہیومن رائٹس کونسل کے مطابق شہریوں کو ذلیل یا خوفزدہ کرنے کے لیے ریاستی طاقت کا استعمال ناقابلِ قبول ہے اور اسے فوری طور پر بند ہونا چاہیے۔
