Raza Musani 
نیویارک : ٹیکساس کے بعد امریکا کی کئی ریاستوں نے چینی شہریوں پر جائیداد خریدنے پر پابندی لگانے پر غور شروع کردیا۔ امریکی ریاست ٹیکساس کی سینیٹ نے حال ہی میں بل 147 منظور کیا ہے جس کے تحت چین، ایران، شمالی کوریا اور روس کے شہریوں اور کاروباری ادارے ریاست میں جائیداد نہیں خرید سکیں گے۔ ٹیکساس کے گورنر گریگ ایبٹ اس پابندی کو دوسری ریاستوں تک توسیع دینے کے خواہاں ہیں۔ ان کوششوں سے فلوریڈا، آرکنساس اور کئی دیگر ریاستیں ایک بل کی تجویز پیش کر رہی ہیں جو چینی شہریوں اور کمپنیوں کو زمین کی خریداری سے روک دے گا۔ چین کی وزارت خارجہ نے جائیداد خریدنے پر پابندی پر برہمی کا اظہار کیا ہے۔ اور کہا ہے کہ قومی سلامتی کے تصور کو عام کرنا اور اقتصادی، تجارتی اور سرمایہ کاری کے مسائل کو سیاسی بنانا مارکیٹ اکانومی اور بین الاقوامی تجارتی قوانین کی خلاف ورزی ہے۔ چین امریکہ اقتصادی اور تجارتی تعاون فطرت کے لحاظ سے باہمی طور پر فائدہ مند ہے۔
