امریکا کا اسرائیل پر مغربی کنارے کی پالیسیاں بدلنے پر زور

واشنگٹن : امریکی صدر ٹرمپ اور ان کے سینئر مشیروں نے وزیر اعظم نیتن یاہو پر زور دیا ہے کہ وہ مغربی کنارے کی پالیسیوں کو تبدیل کریں ورنہ امن عمل پٹڑی سے اتر جائے گا۔ امریکی ویب سائٹ ایگزیوس کے مطابق صدر اور ان کے مشیروں نے نیتن یاہو سے کہا کہ وہ اشتعال انگیز اقدامات سے گریز کریں اور آباد کاروں کے تشدد، فلسطینی اتھارٹی کی مالی امداد اور آباد کاری میں توسیع کے بارے میں بڑھتے خدشات کو دور اور چیزوں کو پرسکون کریں۔ رپورٹ کے مطابق واشنگٹن کا پیغام یہ تھا کہ مغربی کنارے میں تبدیلی کا راستہ یورپی ممالک کے ساتھ تعلقات کی بحالی اور ابراہم معاہدے میں پیشرفت کے لیے اہم ہے۔ ٹرمپ کی ٹیم نے بتایا کہ مغربی کنارے میں پرتشدد اضافہ غزہ کے معاہدے کو متاثر کرے گا اور ابراہیم معاہدے کو وسعت دینے کی کوششوں کو پیچیدہ بنا دے گا۔
واضح رہے کہ اسرائیلی وزیر اعظم بنیامین نیتن یاہو سے ملاقات کے بعد صدر ٹرمپ نے کہا کہ حماس کو غیر مسلح ہونے کے لیے بہت کم وقت دیا جا رہا ہے اور اگر اس پر عمل نہ ہوا تو سخت کارروائی کی جائے گی۔