بدامنی ایران کو اپنے اصولوں سے پیچھے نہیں ہٹا سکتی، ولی امر مسلمین

تہران : ولی امر مسلمین آیت اللہ سید علی خامنہ ای نے واضح کیا کہ دباؤ۔ دھمکیوں اور بدامنی کی وجہ سے ایران اپنے سیاسی اور نظریاتی اصولوں سے ایک قدم بھی پیچھے نہیں ہٹے گا۔۔ ولی امر مسلمین خامنہ ای نے ملک میں حالیہ پرتشدد واقعات کی مذمت کرتے ہوئے قومی اتحاد پر زور دیا ہے۔ انہوں نے خبردار کیا کہ بیرونی ایجنڈے کے تحت پھیلائی گئی بدامنی ایران کو اپنے اصولوں سے پیچھے نہیں ہٹا سکتی۔ انہوں نے واضح کیا کہ ایرانی قوم غلامی اور بیرونی طاقتوں کے ایجنٹوں کو مسترد کرتی ہے اور تشدد عوامی خواہشات کی عکاسی نہیں کرتا۔ انہوں نے کہا کہ کچھ شرپسند عوامی املاک کو نقصان پہنچا کر امریکی صدر ڈونلڈ ٹرمپ کو خوش کرنے کی کوشش کر رہے ہیں۔
آیت اللہ خامنہ ای نے واشنگٹن کو پیغام دیتے ہوئے کہا کہ امریکا ایران کے داخلی معاملات میں مداخلت کے بجائے اپنے مسائل پر توجہ دے۔ انہوں نے معزول شاہ کے بیٹے رضا پہلوی کو شدید تنقید کا نشانہ بناتے ہوئے کہا کہ بیرونی حمایت یافتہ سیاسی فریب ناکام ہوگا۔ ایران کے سپریم لیڈر نے زور دیا کہ متحد قوم ہی دشمنوں کو شکست دے سکتی ہے اور قومی اتحاد ہی بیرونی دباؤ کا سب سے مضبوط جواب ہے۔
ایران میں احتجاج کا سلسلہ جاری ہے گذشتہ روز دارالحکومت تہران اور مشہد سمیت مختلف شہروں میں حکومت مخالف مظاہرین سڑکوں پر نکل آئے، مظاہرے پُرامن رہے اور سکیورٹی فورسز نے انہیں منتشر نہیں کیا۔